Cumissiun da recrutaziun per anflar ina candidata ni in candidat per il presidi communal
Ils 30 da zercladur 2023 vegn il president communal actual a demissiunar pervia dalla limitaziun dil temps d’uffeci. Cun la communicaziun dils 17 da zercladur 2022 (fegl ufficial) ha la suprastonza communala informau corrispundentamein las habitontas ed ils habitonts e communicau che persunas che s’interesseschien per il post dil presidi communal sappien s’annunziar. Tochen uss ei negin s’annunziaus tier la vischnaunca.
Alla sesida dils 24 d’october 2022 ha la suprastonza communala perquei decidiu d’installar ina cumissiun da recrutaziun.
La cumissiun da recrutaziun, menada dil vicepresident communal Maurus Candreja, ha las suandontas finamiras:
- plidentar eventualas persunas che s’interesseschan per il post dil presidi communal ed informar davart pusseivladads d’adattar il profil dalla funcziun;
- rimnar ideas, damondas e spetgas d’eventualas persunas che s’interesseschan per il presidi communal.
Quei pass duei gidar ad endriescher las damondas e las spetgas d’eventualas candidatas e d’eventuals candidats ed a prender en vesta ina midada senza interrupziun sin ils 30 da zercladur 2023.
Tut las votantas e tut ils votants che vulan participar alla cumissiun da recrutaziun ein supplicadas e supplicai da s’annunziar tochen il pli tard dumengia, ils 13 da november 2022, tier l’administraziun communala (info@falera.net / 081 921 35 15). La cumissiun vegn limitada ad ina grondezia adequata.
