Ils 26 da matg 2010 ha l’Uniun astronomica internaziunala (IAU) cun sedia a Paris (Frontscha) ed il Minor Planet Center dall’Universitad Harvard a Cambridge (USA) denominau igl asteroid cun la numera constanta 233943 “Falera”.
Cun la surdada da quei num vegn la lavur digl observatori “Mirasteilas” a Falera renconuschida. Quel sefatschenta dapi il 2008 cun la scuvretga e la determinaziun dils orbits d’asteroids tochen oz nunenconuschents.
José de Queiroz, burgheis da Falera, ha scuvretg igl asteroid 233943 “Falera” ils 21 da november 2009.
En media ha igl object in diameter da circa 3 kilometers. Igl asteroid rotescha entuorn il sulegl sin ina distanza media da circa 471 milliuns kilometers e drova 5 onns e 6 meins per ina rotaziun cumpleina. Il mument da sia scuvretga era igl asteroid ver 315 milliuns kilometers naven dalla tiara. Sia glisch era pli che 16’000 ga pli brausla che quella da talas steilas al firmament ch’ins vesa ad egl.
Igl asteroid vegn identificaus a basa dils suandonts parameters:
inclinaziun (i) = 8.12536°
excentricitad (e) = 0.089360
argument dil perihel = 105.15306°
nuv ascendent = 246.49216°
rotaziun entuorn il sulegl = 5.5868 onns
diameter (ca.) = 3 kilometers
perihel = 2.8672411 AE
afel = 3.4297929 AE
Dapli informaziuns anfleis Vus sin la pagina d’internet dalla NASA.
