Preproject “Fusiun dallas vischnauncas Laax, Sagogn, Falera e Schluein”
Il settember 2020 han las suprastonzas communalas da Laax e Sagogn priu il conclus d’instradar in preproject per la fusiun dallas duas vischnauncas. Basa dalla discussiun ein las diversas collaboraziuns ch’existan dapi onns e che funcziunan senza problems els secturs scola (scalem superiur), pumpiers, spitex, forestalesser, parc da maschinas e fatgs da taglia. Aunc tier ulteriuras spartas dat ei adina puspei puncts, intersecziuns ed incumbensas communablas. Vitier creschan las pretensiuns dalla vart da habitonts, Cantun ed organisaziuns regiunalas enviers las vischnauncas pli e pli pervia dallas novas prescripziuns e regulaziuns.
En connex cul preproject ein las duas vischnauncas Laax e Sagogn vegnidas perina da suandar finamiras strategicas e cundiziuns generalas ch’empermettan in futur communabel. Las discussiuns ella gruppa da project sco era resuns da diversas varts han denton mussau ch’ei fagessi senn d’integrar, sche l’interess commensurau ei cheu, era las duas vischnauncas Falera e Schluein el preproject «fusiun dallas vischnauncas». Avon paucs gis han ton la suprastonza da Falera sco era quella da Schluein rispundiu da maniera positiva la damonda d’ina participaziun al preproject.
La moda d’agir e las cundiziuns generalas elaboradas denter Laax e Sagogn dueien valer era per discuors che suondan cun Falera e Schluein. Las examinaziuns necessarias e las lavurs supplementaras ella gruppa da project caschunan in retard el plan da termins. Aschia sa il preproject buca vegnir presentaus e mess en votaziun alla populaziun sco annunziau la fin digl onn current 2020. Nova finamira ei la primavera 2021. Cun ina decisiun positiva ellas vischnauncas savess’ins entscheiver silsuenter il project da fusiun e las lavurs da detagl tochen tier in contract da fusiun. Finamira fuss ei da preparar in tal en tuttas quater vischnauncas schi datier sco pusseivel alla votaziun. Cunquei han las votantas ed ils votants ina secunda gada la pusseivladad da decider davart ina fusiun dallas vischnauncas.
Per elaborar il preproject accumpogna e sustegn quellas resp. la gruppa da project la firma Contoura SA dad Adrian Wolf da Cuera sco era gl’Uffeci cantunal da vischnauncas.
Per las suprastonzas communalas Laax, Sagogn, Falera e Schluein
Ils presidents communals, Franz Gschwend, Hans Peter Casutt, Wendelin Casutt, Ralf Schlaepfer
