Revisiun totala dalla planisaziun locala – publicaziun
Cun il conclus dils 12 d’avrel 2016 ha la regenza dil cantun Grischun (protocol nr. 338) approbau la revisiun totala dalla planisaziun locala per la vischnaunca da Falera, decidida dalla radunonza communala ils 25 da zercladur 2015, cun las suandontas excepziuns, sistidas, resalvas, ordinaziuns ed indicaziuns:
Lescha da baghegiar art. 22: Per la zona turistica “La Mutta” restan la limitaziun temporara da 10 onns dapi l’approbaziun dalla zona igl onn 2011 e la cundiziun concernent ina cumissiun accumpignonta vinavon valeivlas;
La nova enzonaziun ad “Er Liung” inclusiv l’obligaziun da far in plan da quartier vegn buc approbada. La surfatscha vegn attribuida alla zona per l’utilisaziun futura da construcziun. Persuenter vegnan las novas zonas a “Trutg” che astgan buca vegnir surbaghegiadas puspei attribuidas senza midadas alla zona da baghegiar da tochen ussa;
La zona da baghegiar per igl anteriur stan da sittar el territori da “La Mutta” vegn buc approbada. La parcella nr. 458 ei da considerar sco zona digl ulteriur territori communal, tochen ch’ella vegn attribuida dalla vischnaunca ad ina zona che astga buca vegnir surbaghegiada;
La zona dad auas sper igl “Ual da Mulin” vegn renviada el sectur dalla zona da baghegiar per surluvrar;
Las zonas per indrezs turistics sper “l’Alp Dado” e sper igl implont da pumpadi (lag artificial) vegnan buc approbadas. Ellas ein da considerar sco zonas d’agricultura, tochen che la vischnaunca ha fixau ina zona che astga buca vegnir surbaghegiada;
Las zonas per indrezs turistics a “Crap Sogn Gion” ed a “Curnius” vegnan sistidas, tochen che las premissas per attribuir ellas ad ina zona da baghegiar ein ademplidas;
La nova zona da sport d’unviern en direcziun da “Munt Sura” vegn sistida, tochen ch’ina cuntinuaziun approbabla sin il territori communal da Laax ei avon maun;
Sin fundament d’in recuors da planisaziun pendent vegnan las suandontas determinaziuns sistidas:
– determinaziun per la W2 (schema da zonas) sco era la schraffura digl augment d’altezia sin las parcellas nr. 536, 1651 e 539 a “Samun”;
– determinaziun dalla zona per baghetgs pigns e stabiliments annexs el sectur sid dallas parcellas nr. 1651 e 537.
Dallas actas approbadas e dil conclus dalla regenza san ins prender envesta en canzlia communala duront las uras d’avertura usitadas ni sin la pagina d’internet dalla vischnaunca www.falera.net.
Persunas autorisadas san recuorer encunter il conclus d’approbaziun dalla planisaziun locala enteifer 30 dis dapi la publicaziun a norma dalla lescha davart la giurisdicziun administrativa (LGA) tier la Dertgira administrativa dil cantun Grischun, Via dalla Plessur Sura 1, 7000 Cuera. La decisiun contestada sco era eventuals mieds da cumprova ein d’aschuntar.
Actas d’exposiziun
Decisiun regenza
Rapport da planisaziun e cooperaziun
Lescha da baghegiar
Plan da zonas e plan general da furmaziun 1:2000
Plan da zonas e plan general da furmaziun 1:10000
Plan general d’avertura traffic ed equipament 1:2000
Plan general d’avertura provediment ed allontanament 1:2000
Plan general d’avertura 1:10000
