Scamond da carrar e parcar ella vischnaunca da Falera
A caschun dalla radunonza communala dils 26 da mars 2021 ei vegniu approbau la revisiun dil reglament per l’utilisaziun dallas vias e sendas communalas.
En quei connex ei era vegniu adattau e cumplettau la signalisaziun da traffic. Per habitonts, proprietaris da terren, migiurs e fittaders permanents vegn ei era a dar naven digl 1. da schaner 2022 novas lubientschas da carrar limitadas.
Las lubientschas cotschnas actualas ein cun quei mo aunc pli valeivlas entochen ils 31 da december 2021.
Las novas lubientschas da carrar per habitonts, proprietaris da terren, migiurs e fittaders permanents valeivlas pils onns 2022-2024 san vegnir retratgas naven digl 1. da december 2021 per fr. 10.— tier l’administraziun communala. Quellas ein valeivlas naven digl 1. da schaner 2022.
Per saver retrer quella lubientscha da carrar pigl agen vehichel ston las persunas legitimadas (habitonts, proprietaris da terren, migiurs e fittaders permanents) presentar il certificat dil vehichel. Las lubientschas melnas per visitaders/hosps e las lubientschas/vignettas pil traffic da lavur vegnan buca midadas e restan vinavon valeivlas.
Las prescripziuns da traffic corrispundentas ed il reglament per far diever dallas vias e sendas communalas ein publicai sin la pagina d’internet dalla vischnaunca www.falera.net.
Nus supplichein per enconuschientscha.
