Scamond da carrar e parcar ella vischnaunca da Falera / Novas lubientschas da carrar valeivlas pils onn 2025-2027
Las lubientschas da carrar/vignettas actualas blauas valeivlas pils onns 2022-2024 ein mo pli valeivlas entochen ils 31 da december 2024. Naven digl 1. da schaner 2025 ein perquei mo pli las novas lubientschas da carrar verdas pils onns 2025-2027 valeivlas. Nus supplichein da retrer ad uras las novas lubientschas da carrar. Cas cuntrari rischeis Vus ina multa disciplinara corrispundenta tier ina controlla da traffic.
Las novas lubientschas da carrar/vignettas per habitonts, proprietaris da beins immobiliars, fittadins e fittadins permanents, valeivlas pils onns 2025-2027, san vegnir retratgas tier l’administraziun communala naven digl 1. da december 2024 per CHF 10.–. Las persunas autorisadas (indigens, proprietaris da bains immobiliars, fittadins e fittadins permanents) ston inoltrar ina copia dil certificat dil vehichel per retrer la lubienscha da carrar/vignetta pigl agen vehichel. Encunter ina taxa d’elavuraziun da CHF 2.— ei era ina consegna per posta pusseivla. En quei cass saveis Vus tarmetter naven digl 1. da december 2024 l’empustaziun ed il certificat dil vehichel correspundent per E-Mail sin info@falera.net. Las lubientschas da carrar melnas sco tochen da cheu per visitaders/famigliars e las lubientschas da carrar/vignettas per il traffic da lavur restan senza midadas.
Las prescripziuns da traffic corrispundentas ed il reglament per far diever dallas vias e sendas communalas ein publicai sin la pagina d’internet dalla vischnaunca www.falera.net.
Nus supplichein per enconuschientscha.
