Introducziun dalla procedura electronica per la lubientscha da baghegiar
Per miez schaner 2024 introducescha la vischnaunca da Falera la procedura electronica per la lubientscha da baghegiar. Tut las damondas da baghegiar ein d’inoltrar via la plattafuorma damondas da baghegiar electronicas dalla vischnaunca da Falera.
Damondas da baghegiar en fuorma stampada san vinavon vegnir inoltradas, nus selegrein denton da Vossa damonda da baghegiar electronica. Bugen sustenin nus Vus l’emprema ga che Vus inoltreis ina damonda electronica.
Colligiaziun alla plattafuorma per damondas da baghegiar electronicas
Las damondas da baghegiar da quella procedura vegnan inoltradas cumpletamein online.
Adatg:
L’inoltraziun da dus sets da plans stampai ei actualmein aunc necessaria per damondas da baghegiar ordinarias – entochen che la basa legala per la signatura digitala ei scaffida.
Inoltraziun da:
- damondas da baghegiar ordinarias
- annunzias d’implonts solars (formular d’annunzia ed autodeclaraziun)
- remplazzament dil scaldament
- damondas da baghegiar simplificadas (suonda beingleiti)
Avantatgs per tut las partidas participadas
La procedura electronica per la lubientscha da baghegiar levgescha igl entir process naven dall’inoltraziun dalla damonda da baghegiar tochen l’examinaziun, la lubientscha e la collaudaziun dil project da construcziun. Patruns, planisaders e tiarzs cun dretg d’acceder sco era ils posts specialisai dil Cantun ein colligiai via la plattafuorma e communicheschan ensemen da niev sin via digitala. Aschia vegn il brat da datas e d’informaziuns en connex cun damondas da baghegiar simplificaus, automatisaus e concepius a moda pli transparenta per tut las persunas participadas. Ei dat meins lavur administrativa ed ils cuosts da stampa e spediziun crodan naven.
(Dil tuttafatg) digital
Per il mument stat la plattafuorma deplorablamein aunc buc a disposiziun per ulteriuras damondas sco p.ex. all’Assicuranza d’edifecis ni agl Uffeci per il svilup dil territori. Ina sligiaziun vegn denton elaborada.
Plattafuorma digitala
La vischnaunca da Falera ei sedecidida da buca spitgar sin la plattafuorma EBBV dil cantun Grischun, mobein da luvrar cun in sistem gia existent (Cymo). Igl ei denton garantiu che la sligiaziun actuala ei pli tard cumpatibla cun il project cantunal. Egl avegnir vegn ei ad esser pusseivel da secolligiar cun uffecis externs.
La finamira ei da crear cun la plattafuorma damondas da baghegiar electronicas Falera ina plivalur, schibein per las petentas ed ils petents sco era per las partidas involvidas e l’administraziun.
Damondas
Per damondas stat igl Uffeci da baghegiar da Falera bugen a disposiziun il gliendisdis ed il venderdis avonmiezdi.
Telefon: 081 921 35 15, E-Mail: bauamt@falera.net